A Asemblea da Saúde Mental de Galicia denuncia o grave deterioro da asistencia pública na súa área

A Asemblea da Saúde Mental de Galicia denuncia o grave deterioro da asistencia pública na súa área

Santiago de Compostela, 20 de marzo de 2014.- Esta tarde, a Asemblea da Saúde Mental de Galicia presentou a declaración "Pola protección da saúde mental e contra o deterioro da súa asistencia pública", coa que pretende denunciar a grave situación que está a sufrir esta área e que está a repercutir directamente na cidadanía e na súa saúde.

O seu portavoz, o psicólogo clínico Miguel Anxo García, destacou que a situación en saúde mental é "moi preocupante" e indicou varios datos neste sentido. Denunciou que se carece de datos oficiais que dean conta da gravidade da situación, derivada especialmente da crise económica e da súa xestión. Se ben a Organización Mundial da Saúde (OMS) alertou de que é previsible un incremento da problemática en saúde mental a consecuencia da actual circunstancia económica, non hai información oficial do que está a acontecer.

Tamén sinalou que "non hai plan nin proxecto nin traxectoria de futuro", debido á suspensión do Plan Autonómico de Saúde Mental de Galicia. Así mesmo, declarou que se está a dar un "fenómeno de limitación de acceso aos recursos e de realización dos dereitos asistenciais", con circunstancias como atopar ata o 30% das camas de hospitalización psiquiátrica na actualidade cando historicamente sempre estiveron completas.

A distancia entre as consultas sucesivas está alcanzar tan magnitude que para este movemento é imposible que se preste unha asistencia de calidade, e un amplo sector da sociedade non pode recorrer ao sector privado por carencia de recursos económicos.

Así mesmo, Miguel Anxo García indicou que entre 70.000 e 80.000 persoas en Galicia padecen trastornos mentais graves, e delas, entre 27.000 e 40.00 non acceden aínda ao sistema de atención á discapacidade, previsto na Lei de dependencia.

"Outro dato preocupante é o incremento da taxa de suicidio en 2012 en España", dixo Miguel Anxo García, sinalando que pode gardar certa relación coa actual crise económica. En España pasou dun 6,64% a un 7,5%, "pero en Galicia mantemos a posición de maior agravamento do conxunto do Estado". Así, na Coruña pasouse dun 11,7% a un 13,1%; en Lugo, dun 13,4% a un 16,1%; en Pontevedra dun 8,5% a un 9,1%. Só baixou en Ourense, dun 12,9% a un 11,8%.  Denunciou que non se están a realizar políticas proactivas de prevención do suicidio nin de protección das persoas sen fogar. "É unha xestión do día a día sen horizonte, sen orientación, sen saber o que se está xestionando", denunciou.

Diante da crueza dos datos expostos e da declaración que se fixo nesta Asemblea, Miguel Anxo García sinalou: "O duro está en urxencias cada noite, cando as persoas, achegándose nunhas condicións moi malas a nivel psíquico encóntrase que un recurso que podería alivialas e beneficialas no seu sufrimento, o teñen pechado, ou se lles atende e se lles manda de volta, e chega a ocurrir varias veces. Estamos falando de porta xiratoria en urxencias".

O Colexio Oficial de Psicoloxía de Galicia é unha das institucións que apoia este movemento, co que se pretende informar á cidadanía e tomar medidas para comezar a frear o deterioro en curso.

Más información:  Documento adjunto