Sumámonos á campaña Casilla Empresa Solidaria 2026

En Unión Profesional de Galicia volvemos sumarnos á campaña Casilla Empresa Solidaria, impulsada por EAPN Galicia – Rede Europea contra a Pobreza, co obxectivo de animar aos colexios profesionais, entidades e empresas galegas a destinar o 0,7 % do Imposto de Sociedades ao financiamento de proxectos de carácter social.

Como xa fixemos na pasada edición, convidamos aos nosos colexios profesionais asociados a difundir esta iniciativa entre as súas colexiadas e colexiados, contribuíndo a que un maior número de empresas coñeza esta opción solidaria durante o período de presentación do Imposto de Sociedades.

Un xesto solidario sen custo para as empresas

Marcar a Casilla Empresa Solidaria é unha decisión totalmente voluntaria e non supón ningún custo adicional para as empresas. Este pequeno xesto permite que o 0,7 % da tributación se destine a apoiar programas desenvolvidos por entidades do Terceiro Sector que traballan a favor da inclusión social, da igualdade de oportunidades e do benestar das persoas, especialmente das que se atopan en situación de maior vulnerabilidade.

A casilla está dispoñible nos modelos 200 e 220 do Imposto de Sociedades e pode marcarse durante o período oficial de presentación da declaración, entre o 1 e o 25 de xullo.

Máis empresas solidarias, maior impacto social

Os datos da última campaña reflicten unha resposta crecente do tecido empresarial galego. No ano 2025, máis de 23.200 empresas galegas marcaron a Casilla Empresa Solidaria, o que supuxo un incremento do 20 % respecto ao ano anterior e permitiu alcanzar unha recadación superior aos 4,7 millóns de euros destinados a programas sociais.

Segundo EAPN Galicia, se todas as empresas obrigadas a presentar o Imposto de Sociedades marcasen esta opción, poderían recadarse preto de 20 millóns de euros adicionais para impulsar proxectos de interese xeral.

Ademais, as empresas que participen na iniciativa recibirán o Selo Empresa Solidaria, un distintivo que acredita o seu compromiso coa xeración dun impacto positivo na sociedade.

Desde Unión Profesional de Galicia animamos aos nosos colexios profesionais e ás empresas galegas a coñecer esta iniciativa e valorar a posibilidade de sumarse a unha acción sinxela, voluntaria e sen custo, capaz de contribuír á construción dunha sociedade máis xusta, inclusiva e solidaria.

Para máis información, pode consultarse a web www.casillaempresasolidaria.es ou a información publicada por EAPN Galicia – Rede Europea contra a Pobreza.

Más noticias